نددت حركة "ضد الغلاء" بارتفاع الأسعار كل يوم في جميع السلع والمنتجات الاستهلاكية ولا يرخص سوي المواطن المصري مشيرة الى أنه يشقي ويتعب ليل ونهار عشان يأكل أولاده وعشان يعلمهم ويسترهم في دنيتهم حتى مصاريف مدارس في ارتفاع ومستلزمات المدارس في ارتفاع وأكل وشرب في ارتفاع حتي رغيف العيش في ارتفاع حنعيش ازاي ؟!!!!
وقالت الحركة في بيان صحفي لها " فاض الكيل بينا مش قادرين نكفي بيوتنا بنطالب بحقوقنا محدش بيعبرنا راضيين بلقمة العيش الي بتجيلنا واحنا بنام جعانيين وهما مش راضيين يسيبهولنا عاوزنا نتبرع لمصر منيين وازاي المواطن الي وصل مرتبه لألفان جنيه يعتبر الآن تحت خط الفقر أمال الي تحت الألفين جنيه يعيش ازاي. "
وذكرت الحركة " رزق حنا اللي انتحر مش حيكون آخر واحد حتلاقوا مننا كتير عاملوا كده من قرفهم وفقرهم ..بس احنا مش حنخليكم توصلونا لكده ."
وتابع البيان " داخلين علي عيد الأضحي وكيلو اللحمة وصل مائة جنيه طيب قولونا نعمل ايه احنا اصلا مبنشفش اللحمة غير من العيد الي العيد .... طيب بلاش لحمة العيد ده ... احنا مش حنشتري غير كيلو لحمة واحد في العيد ... معندناش استعداد نمد ايدينا لحد ..."
واختتم البيان بدعوة " شارك معانا لو انت زيك زينا متشتريش غير كيلو لحمة واحد حنعمل حملة مقاطعة للحمة عشان سعرها ينزل ."
